|
Кö улмынам ончыкташ жап шуын |
Калык переписьым эртараш тÿҥалме марте жап шукат ок код, октябрь тылзе койынак лишемеш. Но шкенан калык коклаште тиде кугу политический событийын лишеммыжым, тудлан ямдылалташ кÿлмым палыдыме-влак эше улыт. Тидыже тургыжландара. Кызытсе саманыштат кÿварйымалне илыме гай ÿмырым эртараш лиеш мо?
Цивилизацийыште илена манын, ялыштат йоча-влаклан сото телефоным, компьютерым, тулеч моло электронный аппаратурым наледат: могай гына информацийым (утларакшым кÿлеш-кÿлдымашым) огыт пале, а ончыкылыкыш ойыртемалтше, шке сынан калык семын пеҥгыдын ошкылаш, вияҥаш полшышо увер-аҥарым пален налаш, уш-акылыш, шÿм-чоныш шыҥдараш тыршымаш огеш шижалт.
|
|
Подробнее...
|
|
|
Кундемнам культура пайрем авалта |
8 сентябрьыште Бирск оласе культура полатыште финн-угор калык-влакын «Самоцветы Прикамья» VII Тÿнямбал культура да искусство фестивальышт почылтеш. Тудо ныл кече жапыште республикынан йÿдвел-касвел ужашысе икмыняр районым авалта да ончышо-влакым тÿрлö калыкын мурымаш-куштымашышт дене куандара.
Бирскыште тÿҥалтышым налше культура пайремыш погынышо участник ден коллектив-влакым 9 сентябрьыште Мишкан, Калтаса, 10 сентябрьыште Татышле, Краснокам район-влак, 11 сентябрьыште Нефтекамск ола вашлийыт.
Э. АЛЕКСЕЕВА.
|
|
12 тÿжем теҥгем кучылт кертыт |
Кöн ава (еш) капиталже уло, тудо теният тушеч 12 тÿжем теҥгем окса дене кучылт кертеш. Тудым налаш Россий Пенсионный фондын олаласе да районласе пöлкалашкышт йодмашым намийыман. Пелен тыгак йодшо еҥын паспортшо, ава капиталлан сертификат да банковский счетын реквизитше лийшаш. Пенсионный фондыш заявленийым пуымек, кок тылзе коклаште оксам йодшо еҥын ончыктымо счетыш пыштат.
Ава капитал оксан кугу ужашыжым кучылтмо, оксаже 12000 теҥге деч шагалрак кодын гын, кодшыжым налаш лиеш.
Икшыве (кöлан кöра ава капиталым пуэныт) 2007 ий 1 январь гыч 2010 ий 30 сентябрь марте шочын гын, 12 тÿжем теҥгем налаш заявленийым 2010 ий 31 декабрь марте возыман. Кöн икшывыже 2010 ий 1 октябрь гыч 31 декабрь марте шочеш, заявленийым 2011 ий 31 март марте намиен кертыт. Кызыт ава (еш) капиталын кугытшо 343378 теҥгеат 80 ыр. Республикыште 85 тÿжем еҥын тыгай сертификатше уло, увертара Россий Пенсионный фондын республикысе пöлкаже.
Э. АЛЕКСЕЕВА. |
|
Увер вич йылме дене йоҥга |
Всероссийский калык перепись нерген уверым (тудым эртарыме жапым, «Российлан кажне еҥ кÿлешан» тÿҥ шонымашым, тушко ушнаш кажне еҥым ÿжмашым) республикыште рушла, башкирла, татарла, чувашла да марла колаш лиеш. Башкортостанстатын йодмыж почеш аудиороликым «Башкортостан» кугыжаныш телерадиокомпаний ямдылен, ойсавыртыш-влакым башкир радион да телевиденийын дикторышт йÿкаҥденыт.
(Башкортостанстат.) |
|
Всероссийский калык переписьын шке аралтышыже (талисманже) уло. Тидлан лÿмын конкурс эртен, чылаже 500 сÿретым онченыт да тушеч 126-шо жюрилан келшен. Конкурсант-влак талисман шотеш куткым, мÿкшым, шоҥшым, чывигым да молымат темленыт. Нунын кокла гыч эн оҥайлан Ярославль ола гыч сÿретче О. Беляеван пашажым шотленыт. Тудо кидым рÿзышö весела рвезым сÿретлен улмаш. Жюрин шонымыж почеш, переписьын девизшылан («Российлан кажне еҥ кÿлешан») тиде сÿрет утларак келша. Пермь ола гыч А. Дзюба тупешыже олам нумал кайыше улиткыж дене кокымшо лийын.
Шушаш жапыште Москва, Санкт-Петербург, Нижний Новгород, Уфа, Казань, Самара, Волгоград, Ростов-на-Дону олалаште акцийым эртарыме годым тиде талисманым вераҥдыман информационный листовка-влакым шаркалаш тÿҥалыт.
(Башкортостанстат.) |
|
|
|
|
<< Первая < Предыдущая 1 2 3 4 5 6 7 8 9 10 Следующая > Последняя >>
|
|
Страница 1 из 137 |
