Уфаште илыше-влак самырык-влаклан илыме верым, йоча-влаклан спорт сооружений-влакым чоҥымо шотышто да у пöртыштö налшаш пачерлан  пуымо йомшо оксам пöртылтымö нерген йодыныт. Чыла йодышым кÿчык жапыште решатлаш огеш лий – республикыште шуко йодыш бюджетын изи улмыжлан кöра лектеш, палемден Президент. “Кызыт республикын бюджетыштыже 100 миллиард теҥге уло. Тиде шукыла чучеш гына. Тудым мемнан регионын ныл миллион еҥлан пöлаш гын, кажнылан 25 тÿжем теҥге дене лектеш. Тынар оксалан мом ышташ лиеш? Палемдаш кÿлеш, бюджетын ик кумшо ужашыжым Башкортостан образованийлан кучылтеш. Тудо школ-влакым кучаш, туныктышо-влаклан пашадарым тÿлаш да молыланат кая. Кодшо оксаже здравоохраненийлан, пöрт-влакым чоҥаш, корным ышташ, самырык-влакын политикышт да моло шотышто йодышым решатлаш кучылталтеш. Öршаш уке, тынар оксалан чылажымат ыштен шукташ огеш лий. Иктыжым ыштена гын, весыжлан оксана огеш код. Таҥастараш гын, Москваште бюджетын кугытшо Башкортостанысе деч вич гана, йÿдвелне нефтьым лукман регионлаште 10-12 гана кугурак. Мыланнат тыршаш кÿлеш. Бюджет тÿҥ шотышто налог-влак гыч погына. Сандене предприятий-влакын пашаштым сайын ворандарыман. Промышленностьым вияҥдена гын, ятыр социальный йодышым решатлен кертына”, - каласен Р. Хамитов.

     Илышыште кажне переписчиклан 12 кече жапыште 400 наре еҥым йодышташ логалеш гын, виртуальный модышышто кум кÿкшытым гына эртыман. Но тыштат шагал огыл тÿрлö чаракым вашлияш логалеш – оза-влакын тендан дене мутланаш але суртышкышт пурташ кумылышт уке, уремыште пийым але ялыште суртвольыкым вашлийын кертыда…
     Тиде модыш, вашке гыч мемнан суртыш анкета дене толшаш еҥ-влак олмышто шкенам ужын, нунын пашаштым да икте-весынамат сайынрак умылаш полшышаш, увертара «Всероссийский калык переписьын» пресс-службыжо.

     “Российын туныктышыжо-2010” Всероссийский конкурсын участникше-влак Москва воктене ныл кечаш семинарыш погыненыт. Нунын коклаште “Башкортостанын туныктышыжо-2010”, Стерлитамакысе 26-шо школышто тÿҥалтыш класслаште туныктышо Е. Кузьмина уло. Семинар годым конкурс заданий-влакым шукташ тÿҥалыт, ончычсо ийласе сеҥыше туныктышо-влак тренинг, модыш-влакым эртарат, мастер-классым ончыктат. “Российын туныктышыжо-2010” конкурсын тÿҥ мероприятийже-влак Магнитогорскышто 23 сентябрь гыч 4 октябрь марте эртаралтыт, сеҥышым Москваште 5 октябрьыште саламлат.

     Башкортостан Правительствын вице-премьерже Ш. Вахитовын мутшо почеш, республикыште тений 800 тÿжем тонн шурным поген налшаш улыт. Эртыше ийысе дене таҥастарымаште, тиде кум миллион утла тоннлан шагал. Кызытсе кокла шурно лектыш - ик гектар гыч 8,9 центнер. Тидын нерген вице-премьер эртыше видеоселекторный совещанийыште ойлен.
     Кокияшым жапыштыже да эртыше ийысе наре ÿдаш огыл гын, республикын шушаш ийыште ÿдаш пырчыже ок лий. Кызыт тиде сомылым 48 районышто тÿҥалыныт. Кокияш уржам 1-ше сентябрь марте ÿден шуктыман гын, шыдаҥ ден тритикалем 15 сентябрь марте лиеш.
     «Вÿдыжгö сита гын, 750 тÿжем гектар мландыште кокияшым ÿден кертына, но тачысе кечылан тиде – пеш неле задача», - каласен Ш. Вахитов.
     Специалист-влак республикыште вÿдыжгö шагал улмо нерген ойлат, садлан 175 тÿжем гектарыште гына ÿдаш палемдыме. Кызыт пасушко чылаже 385 ÿдышö агрегат лектын. Нуно ик кечылан улыжат куд тÿжем гектар мландым (ик агрегатлан 16 гектар дене логалеш) ÿдат.