Колызо колызым сийлен мошта Кÿтÿм кÿташ черет мый декем шуо. Шокшо кечын шорык эҥер воктен каналташ йöрата, а мый, эҥер серыште верланен, пÿртÿсын моторлыкшым ончен, илышыште лийше оҥай историй-влакым шарналтен шинчем.
Палымем-влак Кстынчий павай ден Такияна кокай Эльян посёлкышто иленыт. Павай кочывÿдым холодильникыште кужаш шинчыктен огыл: ала пушыжо кая, ала пужла манын, кленчам ястаренак шоген. Такияна кокай тудын налме кленчам, магазиныш пöртылтен, оксажлан киндым налын.
Чолман воктене илен, колызо от лий гын, могай пöръеҥ улат? Паваят тиде сомылым пеш йöратен. Пÿртÿсыш лектын, эҥер воктен, шке гает колызо але палыме-влак коклаште коштын, пагытшат веселан эрта. Такияна кокай Кстынчий павай дене пырля эҥер серыш каналташ да пелашыжым «тергаш» лектын.
Икана шоҥго-влак эҥер воктек ошкылыныт. Эльяныште Чолманын серже тура. Такияна, йолжым серыш сакалтен, уныкажлан пижым пидеш веле, коклан колызым ончал колта. Камбарка велне Кстынчий павай деч иктаж кок меҥге тораште илалшырак пöръеҥ шинчылтеш. Кок колызо икте-весыштым огыт пале, очыни, садлан «унала» огыт кошт. Такияна онча: пелашыже, вÿд воктек волен, ала кучымо колжым мучыштара, ала кидшым мушкеш, мо-гынат серыште тошкештеш. Ик жап гыч колызына шокшо ошмаш шуйнен возо. Такияна, содор гына кид пашажым кудалтен, Кстынчий дек ошкылеш. Тудыжо руштынат, мален кия улмаш. «Кузе тыге лийын кертеш? Воктекыже ик еҥат миен огыл. Пеленже кочывÿд нигузе лийын огеш керт. Чолманын вÿдшö «градусан» лиеш гын, уло калык, вÿдым йÿын, руштеш ыле, но але марте икте денат тыге лийын огыл», - öрын шонкала ÿдырамаш.
Вашмутым «палыдыме» колызо гына пален. Тудо пеш устан Такияна коканам ондален: колко олмеш кленчам пижыктен, Кстынчий павай дек йоктарен колтен. Тудыжо шÿдырен луктын подылын да, лескым шупшылын шижтарен, мöҥгеш колтен. Тыге, икте-весыштым сийлен, кленча пытымеш шогылтыныт - шоҥгылан ситен.
Е. АПТУКОВ.
Нефтекамск ола. |
|
6-шо июльышто Башкортостанын Президентше М. Рахимов республикын йÿдвел районлаштыже лийын. Мишкан селаште районысо рÿдö эмлымверым чоҥымым ончен. Тыште 60 верлан у хирургический корпусым нöлтат. Проект почеш, 5100 квадрат метр кумдыкан, кок пачашан у зданийыште операций ыштыме кок да шочыктымо кок отделенийым почыт. Палемдаш кÿлеш, аза шочмо дене Мишкан район республикыште кокымшо верыште улеш, икымше - Бурзян район. Эмлымверым чоҥымылан республикысе бюджет гыч 50 миллион теҥгем ойырымо. Йÿштö-влак толмеш зданийым нöлтен, окна, омса-влакым шогалтышаш улыт. |
Кукшо игече могай эҥгекым конден? Кодшо арнян эртыше Россий ял озанлык министерствысе штабын селекторный заседанийыштыже кукшо игечылан кöра увертарыме чрезвычайный ситуаций дене кылдалтше йодыш-влакым каҥашеныт.
«Республикыште вольыклан ужар кургым ситараш чыла йöнымат кучылтына. Кукшо игечын «пашажым» тöрлаташ ял озанлык производитель-влаклан ик миллиард теҥгеаш полышым ыштыме», - каласен Башкортостанысе ял озанлык министрын икымше алмаштышыже
Н. Коваленко. Тудын мутшо почеш, игечылан кöра чыла 54 районыштат чрезвычайный положенийым увертарыме. Республикыште кургым ямдылыме паша икшырымын кая. 7 июльлан ик вольыклан шотлымаште 7,2 центнер кургым ямдылыме. Вурган кургым 46 районышто погат.
Кызыт республикыште тÿҥ сомыл семын аграрий-влаклан кургым ситышын ямдылаш шÿдымö. Тидын годым частный секторат öрдыжеш ок код. Калык чодыраште, коремлаште шудым сола. Шудо ден олым огыт сите гын, Пермь край, Свердловск, Тюмень областьла гыч кондаш палемдыме. Тидын шотышто ончылгоч кутырен келшыме.
Чрезвычайный ситуацийым Татарстан, Самара, Оренбург, Саратов, Челябинск, Мордовий, Удмуртий, Чуваший, Волгоград, Пенза, Нижегородский ден Воронежский областьлаштат (чылаже 14 регион) увертарыме.
Лишыл жапыште Россий ял озанлык министерство нине регионлаште кукшо игечылан кöра могай эҥгек лиймым текшыраш тÿҥалеш. Тудым иктешлымеке, кугыжаныш деч полыш ойыралтеш, садлан министр Е. Скрынник, жапым шуйкалыде, регионла гыч кÿлеш документ-влакым министерствыш колташ шÿден. |
Школышто тунемме пагыт шинча ончылнына эртен кайыш 2010 ий 26 июнь. Мишкан районысо Кÿрзе ялыште школлан 105 ий теммым палемдат. Меат ты пайремыш ушнышна.
Ожно ял мучаште пырня дене ыштыме ик пачашан пöрт-влакыште тунемыт ыле. Кызыт кермыч дене чоҥымо кок пачашан школ ял покшелне верланен. Школышто волгыдо класс, спортзал да моло кабинет-влак улыт. Воктенак парк. Пайремым тушто эртараш ямдылалтыныт.
Тÿрлö жапыште Кÿрзе школышто тунемше-влак ола, ялла гыч пайремыш погыненыт. Тудым эртараш ойым ончычсо туныктышо
А. М. Салмиянов пуэн да ямдылалташ полшен.Тиде пайрем шÿмеш да шарнымашеш кодо. Чылалан, кö эртараш полшен, тау мутым каласыме шуэш. Тиде возымем шке деч гына огыл, толшо уна, йолташ-влак, ял калык лÿм денат. Пайрем годым икте-весе дене пеш шуко ойласенна. |
|
Подробнее...
|
|
|
