22 январьыште Москваште Россий Кугыжаныш Советын заседанийже эртен. Моло регион-влакым вуйлатыше-влак коклаште Башкортостан Президент М. Рахимоват лийын. Заседанийыште политический ден партийный институт-влакым вияҥдыме, верысе самоуправлений, судебный ден правам аралыме система шотышто да моло йодышымат каҥашыме, сайлымаш система да политический партий-влакын пашаштышт лийшаш вашталтыш-влак нерген каласыме. Россий Президент Д. Медведев 2010 ийын тÿҥ задачыжлан элысе экономикым нöлталме, калык коклаште пашадымылыкым, нужналыкым иземдыме сомылым палемден. Тудын шонымыж почеш, элнам вияҥдашлан регион ден субъект-влак кокласе кылым пеҥгыдемдаш, калыкым политика илышлан кумылаҥдаш, ушнаш ÿжаш кÿлеш. «Тидлан регионым вуйлатыше кабинетыште гына шинчышаш огыл, калык коклашке лектын коштшаш, нунын илышыштым шке шинча дене ужшаш да тыге гына пашажым ворандарышаш», - Россий Президентын мутшым пеҥгыдемден каласен М. Рахимов.