26 январьыште Изи наука академийын положенийже почеш районышто шымлыме пашам аралыме конкурс эртен. Чылаже ныл секций пашам ыштен: «Естествознаний», «Башкортостанын культурыжо да историйже», «Чын наука», «Лингвистика».
     «Лингвистика» ужашыште руш да марий йылме дене шымлымаш паша-влак аклалтыныт. Руш йылме да литератур секцийыште Мишкан селасе икымше ден Чорай кыдалаш школ-влакын тунемшышт паша лектышышт дене палдареныт. Нуно оҥай тема-влакым ойырен налыныт: «Языковые стразы» (Андрей Изилянов, Чорай школ, 11-ше класс), «СМС как речевой жанр» (Вадим Дигитаев, Мишкан 1-ше № школ, 9-ше класс), «Молодежный сленг и место в нем слов-паразитов» (Надежда Кошиева, Мишкан 1-ше № школ, 9-ше класс) да молат.
     Марий йылме да литератур дене паша-влак Чорай, Ардаш, Ирсай, Пÿрöмучаш да Токтар школла гыч лийыныт. Тыште могай гына йодышым тарватыме огыл?! Теве, мутлан, Чорай школ гыч 9 классыште тунемше Полина Изилянова «Мый, жапем да шочмо йылме» пашаштыже тÿрлö жапыште тÿрлö верлашке логалше землякше-влакын шочмо йылмым йöратымышт да сагынымышт нерген воза, шочмо йылмым тунеммашын кÿлешлыкшым пеҥгыдемда. Ирсай кыдалаш школ гыч Галя Агеева марий да руш калыкын вургем лÿмыштын мом ончыктымыштым лончылен, каласкалымыжым колышташат пеш оҥай лийын. Ардаш школын 9 классыште тунемшыже Юлия Ильтубаева марий да пошкырт йылмыласе грамматикыште икгайлык да ойыртем йодышым тарватен, мутерымат чумырен. Тиде школ гычак 9 классыште тунемше Эдита Кутлукаева «Кок йолташ» темыштыже композитор А. Искандаров ден писатель Я. Ялкайнын илыш пÿрымашыштышт икгайлыкым шымлен.  А Токтар школ гыч 8 классыште тунемше Виктория Валиуллина шочмо кундемысе вер-шöр  лÿм-влакын мом ончыктымыштым радамлен да нунын дене кылдалтше легенда-влакым чумырен.
     Примерым шуко кондаш лиеш. Мо куандара, тунемше-влак шке пашаштым аралымышт годым мультимедийный проектор дене моштен пайдаланат. Кÿлеш материалым шке жапыштыже фотографироватленыт, илалше-влак деч йодыштыныт, музейлашкат лектын коштыныт.  Иктешлымаш почеш пале лийын, марий йылме дене сеҥышыш  Г. Агеева лектын, призер-влак семын В. Валиуллинам, Э. Кутлукаевам палемдыме. Конкурсын участникше-влак тидын дене гына ынешт серлаге, шымлымаш пашаштым умбакыжат шуяш шонат.