1995 ий гыч тÿҥалын, ий еда январь кыдалне Бирск олаште «Крешын йÿштö» эстрада муро да куштымаш фестиваль эрта. Тÿҥалтыште тудо Бирск ола да районысо шоктышо, варарак куштышо самырык коллектив-влакын конкурсышт семын палыме лийын гын, таче республикысе да Урал кундемысе самырык мурызо-влакым чумырен шогышо кÿкшö форумыш савырнен. Тений гына тиде фестивальыште Башкортостанысе 35 ола да районла, тугак Челябинск, Самара областьла, Татарстан Республика, Узбекистан гыч 574 ÿдыр-рвезе участвоватлен. Нунын коклаште Мишкан гыч Дина Баюршина кок марла мурым шергылтарен, диплом да шергакан пöлек дене палемдалтын. Тудын дене гала-концертыште вашлийын мутланышым.
     - Дина, фестивальыште тый икымше марий мурызо лийынат? «Икымше мелна ыш когарте»?
     - Укела чучеш. 160 утла номер гыч латкудытшым (нунын коклаште мыйымат) гала-концертыш нальыч.
   
- Тыгай конкурсшо тылат икымше огыл?
     - Уке. Икымше гана 2008 ийыште Йошкар-Олаште эртыше «Ший памаш» фестивальыште кумшо верым налынам. 2009 ийыште тудо финн-угор эстрада муро конкурсыш савырныш, тушто кокымшо лийым.
     - Мурым кöн полшымыж дене ойырен налат? Могай мурым мурет?
     - Мый тыште кок мурым мурышым: В. Николаевын «Йöраталме йолташем» (семжат, мутшат тудын) да В. Садретдиновын «Пöртылат» (мутшо Эсен Элайын). Профессиональный полыш, аранжировка йодыш-влак дене Валерий тÿҥ эҥертышем улеш.
     - Фестиваль деч вара могай шонымаш-влак шочыч?
     - Мöҥгö нöлтшö кумыл дене каем. Ятыр у йолташым муым. Паша дене кылдалтше у шонымаш-влак шочыч. Мый Мишканыште искусство школышто туныктем, «Ладушки» йоча ансамбль дене ыштенам.
     «Крешын йÿштö» фестивальын икымше кечыштыже  Башкортостанысе культура да национальный политика министр И. Г. Илишев толын ыле. Гала-концерт деч вара Бирск район да ола администрацийым вуйлатыше Н. А. Хорошилов (тудак фестивальын оргкомитет председательже) Башкортостанысе самырык-влак политика, спорт да туризм министрын алмаштышыже С. Т. Сагитов сеҥыше-влакым саламлышт.
     Кум номинаций гыч кокытшо дене Гран-при Бирск олаш - Р. Аитовлан (эстрада муро) да «Вавилон» театрлан (эстрада куштымаш) - кодо. «Музыкальный коллектив-влак» номинаций дене Гран-прим Благовещенск ола гыч «Инсайт» группа нале.
     Фестивальыште элнан рÿдолаж гыч толшо «Премьер-министр» группа выступатлыш.