75 ий ончыч БАССР ЦИК Президиумын пунчалже дене Шаран район ышталтын. Кызытсе жаплан тудо йол ÿмбалне пеҥгыдын шога. Вич шÿдö километр газ пучым шуйымо. Тыге 96 процент утла калык канде тул дене пайдалана, куд тÿжем утла илыме пöрт, тугак социально-культурный объект, школ, культура учреждений, медпункт-влак газын куатше дене ырыкталтыт. Чоҥымо паша сайын мия. Республикын суверенитет ийлаштыже гына районышто коло  школым, лу культура учрежденийым, коло кок фельдшер-акушер пунктым чоҥымо. Райрÿдыштö шуко уремым асфальтироватлыме, ял-влак коклаште корным саемдыме. Тиде да моло сеҥымаш нерген район администраций вуйлатыше И. М. Самигуллин районысо культура пöртыштö районын юбилейже лÿмеш да Республикын ийжылан лÿмдымö торжественный погынышто ойлыш, районын шуко лÿмлö еҥжым палемдыш, суапле пашашт дене ончыко лекше-влаклан Почетный грамотым кучыктыш. Пайремыш погынышо-влакым «Шаранагрогаз» озанлыкын директоржо Т. М. Тимеркаев, Шаран селан почетный гражданинже, паша ветеран Р. З. Назмутдинов саламлышт. Чапле концерт номер-влак калыкын кумылжым нöлтышт.
     Пайрем тиде мероприятий дене гына ок мучашлалт. Мотор кеҥеж кечын, Сабантуйым эртарыме жапыште, район, уло шочшыжым, лÿмлö еҥже-влакым поген, юбилейжым кугун пайремлаш шона.

     Мешер пелекыдалаш школышто ече дене районысо таҥасымашым чÿчкыдын эртарат. Тиде ганат ÿдыр-влак кум километрым эртышт, рвезе-шамыч - визытым. Тÿҥ школ-влак кокла гыч икымше вер Яммат школлан (туныктышо В. Ишумбаев), кокымшо Мешерлан (С. Асылгузин), кумшо Янахматлан (А. Байбулатов) логале. Шуко ий почела тиде школ-влак физкультура паша дене эре ончылно улыт. Кыдалаш школ-влак кокла гыч Шаран селан икымше школжо (С. Фёдоров) икымше верыш, кокымшыш Триключа школ (В. Наумов), кумшыш Тошто Тумбагуш школ (А. Ильгузин) лектыч. Тиде кечын Шаран кыдалаш школын туныктышыжо спортсменже-влакын пеш куштылгын сеҥышыш лекмыштлан коллегышт деч шагал огыл шылталыме шомакым кольо. Молан манаш гын школын тачысе писе ечызыже-влак кокла гыч шукышт кÿшнö ончыктымо тÿҥ школлаште изинек ечыгорным такыртеныт, кызыт Шаран селаште кыдалаш шинчымашым налыт да спорт денат чапшым нöлтат.
     Тале спортсмен-влак Почётный грамота да кумылаҥдыше пöлек-влак дене палемдалтыч.

     Январь мучаште Шаран селасе кокымшо кыдалаш школышто
М. Акмулла лÿмеш Башкир кугыжаныш педуниверситетын кечыже эртыш. Тушко толшо профессор да доцент-влак Башкортостанын кугыжаныш йылмыжым тунемме шотышто научно-методический семинарым эртарышт, туныктышо ден класс вуйлатыше-влаклан икмыняр мастер-классым ончыктышт, кумылан-влаклан психологический консультацийым пуышт, тенийсе ЕГЭ нерген да вузлаш кузе тунемаш пураш лиймым умыландарышт, 10-11 класслаште чыла ЕГЭ ден кылдалтше предмет-влак дене виш урок-влакым эртарышт.
     Пытартышлан «Формы взаимодействия вуза и работодателя в сфере содействия трудоустройства выпускников» тема дене эртарыме «йыргешке ÿстел» шке йырже школ вуйлатыше-влакым чумырыш. Тудым исторический ден правовой образований институтын директоржо, район-влакын кураторыштын Советшым вуйлатыше профессор Г. Т. Обыденнова вÿдыш.

     Вес арнян мемнан республикысе школлаште марий йылмым да литературым туныктышо-влак шинчымашым пойдараш чумыргат. 8-13 февраль кечылаште Шаран районышто эртышаш курсышто Шинчымашым вияҥдыше Башкир институтын пашаеҥыштым, вузласе преподаватель-влакым колыштыт, Шаран селасе 1-ше, Тошто Тумбагуш, Зирикле да моло школлаште лийыт.