Пÿрымашлан кöра Одо кундемеш «вожым колтенам» гынат, садак Краснокам районысо Маняк ялым шочмо суртемлан шотлем. Тушто иленыт авам, родо-тукымем, пошкудем, палымем-влак. Волгыдо ош тÿняш нигöат ача-ава да Юмын пÿрымаш деч посна ок тол. Илыш чынжымак моткоч оҥай. Ала-момат чыташ перна, но сайлан ÿшанымаш вийым пуа да куаным вучаш тарата.
     Йöратыза ача-авадам, икшывыдам, уныкадам, родо-тукымдам, лишыл еҥ-влакым. Ты тÿняште улмыштлан куанен моштыза. Осалым шонышо-влакын чонышт тек паремеш. Икте-весе дене келшен, умылен, ÿшанен илет гын, рыҥ тошкалын, корно дене куанен ошкылаш лиеш. Тунам тый умылет, тыйым умылат, пагалат. Но южгунам осал сÿретымат ужаш логалеш, садлан кертме семын полыш киднам шуялтышаш улына.
     Теве Маняк кандашияш школым тунем пытарымылан пел курымат эртен. Кушто улыда, пырля тунемме йолташем-влак? Пÿрымашда могай?
     Самырык жап ушеш возеш, йолташ-влак омеш кончат. Ятыр жап икте-весына дене ойырлен илена. Икте-весым вашлийын кутырымо, илышышт нерген палыме моткоч шуэш, садланак шочмо верыш миен савырнаш тыршем.
     Пырля тунемме йолташем-влак, ида ойгыро, тазалык начарештеш, шоҥгемына манын ида шинчылт. Ондак, тунемме пашам шукташ манын, школыш коштынна гын, таче вес пашаште шолына, сурт сомылым шуктена, икшыве да уныкана-влакым ончена.
     Ялысе туныктышо-влакын школышто шкеныштым чаманыде тыршымыштлан кугу тау. Нунылан кужу ÿмырым, волгыдо илышым тыланем. Тек Ош Кугу Юмо ÿмырыштым порын шуйыжо. Самырыкна годым нунын кумылыштымат коденна дыр, ала торжа мутымат каласенна, туге гынат мутыштым колышт кушкынна. Таза лийза, шкендам аралыза.