Кугыжаныш шöрым ыштышылан  полышым пуа – ончыкыжым кукшо да стерилизоватлыме шöрым, ушкал ÿйым да сырым палемдыме ак почеш налын  ужалаш тÿҥалыт.
     Тидын нерген шöрым ыштыше-влакын Национальный ушемыштын I съездыштыже Россий ял озанлык министр Е. Скрынник ойлен. Шöрым кугыжаныш тений 300 тÿжем тонным налшаш, а аралашлан 300 миллион теҥге окса кÿлеш.
     Лишыл жапыште регионлаште шöрым налшаш кугытым палемдат. Шöр утен кодмылан кöра фермер да переработчик-влак коклаште 2009 ий кеҥежым ÿчашымаш лектын. Тунам фермер-влак заводлаште шöрым изи ак дене (6-8 теҥге дене) налмыштлан вуйым шийыныт.
   
«Кызыт ик литр шöр 8-9 теҥгем шога гын, ончыкыжым 11 теҥге деч ÿлыш лийшаш огыл.  Ужалыше фермер-влакын кÿсеныштышт 30 процент окса гына кодеш, а паша лектышыже лийже манын, тудлан 45 процент деч шагал огыл кодшаш», -  каласен «Союзмолоко» правленийын председательже А. Даниленко.
     Правительствын икымше вице-премьерже, ял озанлык секторым вÿдышö В. Зубковат фермер-влакын ойышт дене келшен. «Завод-влак акым ынышт волто манын, ончыкыжым текшыраш тÿҥалына. Уке гын Правительство кооперативный завод-влакым почаш тÿҥалеш. Тек нуно ик кечылан 300-500 тонн дене шöрым налыт. Тыгай проектна уло да нунылан субсидийым ойырен кертына. Ик ойыш огына шу гын, ял калыклан шкаланжак шöр кочкышым ышташ да шкеак ужалаш йöным ыштена», - манын. Тудын мутшо почеш, 2010 ийыште шöрым ыштыме пашам вияҥдашлан бюджет гыч 20,6 миллиард теҥге (2009 ийыште – 12,8 миллиард) оксам ойырымо лиеш.